वाल्मिक कराडचे आणखी कारनामे समोर, CID च्या चार्जशीटमध्ये मोठे खुलासे

बीड: बीड जिल्ह्यातील मस्साजोगचे सरपंच संतोष देशमुख हत्याकांड प्रकरणी गुन्हे अन्वेषण विभागाने अर्थात सीआयडीने चार्जशीटमध्ये मोठे खुलासे केला आहे.

यामुळे हत्याप्रकरणातील प्रमुख आरोपी आणि हत्येचा मास्टरमाइंड वाल्मिक कराड याचे पाय आणखी खोलात गेले आहेत. सीआयडीने कोर्टात आरोपपत्र दाखल केले आहे. सीआयडीने आपोपमध्ये आका अर्थात वाल्मिक कराडबाबत मोठे खुलासे केले आहेत. वाल्मिक कराडच्या कारनाम्याचा कच्चाचिठ्ठाच उघडला आहे.

वाल्मिक कराड याला बीड जिल्ह्यात आपला दबदबा कायम ठेवायचा होता. म्हणूनच त्याने विविध विकास प्रकल्पांमधून पैसे मिळवण्यासाठी बीड जिल्ह्यात अनेक गँग्स तयार केल्या होत्या, असे आरोपपत्रात म्हटले आहे. याबाबत सीआयडीने अनेक पुरावे देखील कोर्टात सादर केले आहेत.

संतोष देशमुख हत्याप्रकरणाचा तपास सीआयडी करत आहे. तपास अधिकाऱ्यांनी गोपनिय पाच साक्षीदारांच्या हवालेने वाल्मिक कराडसह इतर आरोपींच्या विरोधात कोर्टात आरोपपत्र सादर केले आहे. खंडणी मिळाली नाही तर वाल्मिक कराड याला प्रचंड संताप येत होता. तो आधी पीडितांचे अपहरण करायचा आणि नंतर त्यांचा अमानूष छळ करत होता. सीआयडीने आरोपपत्रामध्ये एका खंडणी प्रकरणाचा देखील उल्लेख केला आहे. त्यामुळे वाल्मिक कराडच्या अडचणीत आणखी वाढ झाली आहे.

सरपंच संतोष देशमुख यांची अमानूष छळ करून त्यांची निर्घृण हत्या करण्यात आली. मारेकऱ्यांनी या घटनेचे तब्बल 15 व्हिडिओ बनवले होते. आठ फोटो काढण्यासोबतच दोन व्हिडिओ कॉल्स देखील केले होते. हे व्हिडिओ महेश केदार नावाच्या एका आरोपीच्या स्मार्टफोनवरून शूट करण्यात आल्याचे एका तपास अधिकाऱ्यांने सांगितले. हे सर्वकाही सीआयडीने आरोपपत्रात नमूद केले आहे.

संतोष देशमुख प्रकरणात पोलिसांना आणखी एक महत्त्वाचा पुरावा मिळाला आहे. संतोष देशमुख यांची हत्या करण्याआधी त्यांचा खूप छळ करण्यात आला होता. मारेकऱ्यांनी संतोष देशमुख यांचा केलेला छळ लाईव्ह व्हिडिओद्वारे मोकारपंती ग्रुपवर दाखवला होता. आरोपींनी 4 वेळा व्हिडिओ कॉल केल्याची माहिती मिळाली आहे. मोकारपंती ग्रुपवर व्हिडिओ कॉल करणारा आरोपी कृष्णा आंधळे असून तो सध्या फरार आहे.