पुण्यात कोयत्याने वार करुन तरुणाच्या खुनाचा प्रयत्न; एक आरोपी अटक

पुणे: पुर्ववैमनस्यातून तरुणावर कोयत्याने वार करुन त्याच्या खुनाचा प्रयत्न केल्याची घटना घडली आहे. हा प्रकार खडकीतील रेंजहिल्स भागात घडला. याप्रकरणी पोलिसांनी एकाला अटक केली असून, साथीदार पसार झाले आहेत.

रेहान मोहम्मद शेख (वय २२, रा. खडकी) असे गंभीर जखमी झालेल्याचे नाव आहे. याप्रकरणी अनिकेत काळे (रा. रेंजहिल्स झोपडपट्टी, खडकी) याला अटक करण्यात आली असून, त्याचाबरोबर असलेला साथीदार आकाश काळे याच्यावर गुन्हा दाखल करण्यात आला आहे. याबाबत रेहान शेख याने खडकी पोलीस ठाण्यात तक्रार दिली आहे.

पोलिसांनी दिलेल्या माहितीनुसार, शेख आणि काळे यांच्यात काही महिन्यांपूर्वी वाद झाला होता. मंगळवारी (५ मार्च) रात्री अकराच्या सुमारास शेख रेंजहिल्स परिसरातून निघाला होता. त्यावेळी आरोपींनी त्याला अडवून शिवीगाळ केली. त्याच्यावर कोयत्याने वार करुन आरोपी पसार झाले. गंभीर जखमी झालेल्या शेख याला रुग्णालयात दाखल करण्यात आले. पोलिसांनी आरोपी अनिकेतला अटक केली असून, त्याच्याबारेबर असलेल्या साथीदाराचा शाेध धेण्यात येत आहे.

पोलीस उपनिरीक्षक अर्जुन बेंदगुडे अधिक तपास करत आहेत.