हुक्का बार चालविणार्‍या औंध बाणेर लिंक रोडवरील एका कॅफेवर चतु:श्रृंगी पोलिसांनी छापा:हुक्का पार्लर चालविणाऱ्या पाच जणांवर गुन्हा दाखल

पुणे : हुक्का बार चालविणार्‍या औंध बाणेर लिंक रोडवरील एका कॅफेवर चतु:श्रृंगी पोलिसांनी छापा टाकला. हा हुक्का बार चालविणार्‍या पाच जणांवर गुन्हा दाखल करण्यात आला आहे.

फार्म कॅफे असे कारवाई झालेल्या कॅफेचे नाव आहे. याबाबत पोलीस अंमलदार वाघेश भीमराव कांबळे (वय ३२) यांनी चतु:श्रृंगी पोलीस ठाण्यात फिर्याद दिली आहे. त्यावरुन कॅफे मालक अमित वाळके (रा. औंध), मॅनेजर बलभीम कोळी (रा. व्हाईट हाऊस हॉटेलजवळ, बाणेर -औंध लिंक रोड, औंध), कॅफे चालक विक्रम कुमार द्वारकाप्रसाद गुप्ता (वय २३, रा. फार्म कॅफे, बाणेर), हुक्का भरणारा वेटर सुरज संजय वर्मा (वय २४), राजकुमार चन्नू अहिरवाल (वय १९, रा. फॉर्म कॅफे, बाणेर) यांच्यावर गुन्हा दाखल करण्यात आला आहे. बाणेर येथील फार्म कॅफे वर पोलिसांनी रविवारी पहाटे एक वाजण्याच्या सुमारास ही कारवाई केली आहे

पोलिसांनी दिलेल्या माहितीनुसार, बाणेर लिंक रोडवरील फार्म कॅफे येथे ग्राहकांना हुक्का पिण्यास दिला जात असल्याची माहिती चतु:श्रृंगी पोलिसांना मिळाली. त्यानुसार औंध – बाणेर लिंक रोडवर आतमध्ये शेतजमीनवर शेड टाकून हा फार्म कॅफे चालविला जात होता. पोलिसांनी पहाटे एक वाजण्याच्या सुमारास त्यावर छापा टाकला. त्यावेळी ५ ते ६ ग्राहकांना धुम्रपानासाठी अवैधरित्या तंबाखुजन्य हुक्का पुरविला जात होता. शेडमध्ये विविध कंपनीचे तंबाखुजन्य हुक्क्याचे फ्लेवर ठेवले होते. पोलिसांनी येथून ४८ हजार ६५० रुपयांचे हुक्क्याचे फ्लेवर, २० काचेचे हुक्का पॉट व हुक्क्याचे साहित्य जप्त केले आहे. यावेळी वरिष्ठ पोलीस निरीक्षक उत्तम भजनावळे, सहायक पोलीस निरीक्षक अनिकेत पोटे, पोलीस उपनिरीक्षक दत्तात्रय येळे, उमेश कोळी यांनी घटनास्थळी भेट देऊन पाहणी केली. सहायक पोलीस निरीक्षक अनिकेत पोटे तपास करीत आहेत.