सिंहगड कॉलेजजवळील धक्कादायक घटना तरुणावर कोयत्याने वार, दगड डोक्यात घालून निर्घृण हत्या

पुणे : सिंहगड रस्ता परिसरातील वडगाव बुद्रुक येथे आज सोमवारी दुपारी घडलेल्या एका थरकाप उडवणाऱ्या घटनेनं शहरातील गुन्हेगारीचा प्रश्न पुन्हा एकदा ऐरणीवर आला आहे. रहिवासी सोसायटीच्या पार्किंगमध्ये एका 22 वर्षीय तरुणावर कोयत्याने सपासप वार करत आणि त्यानंतर मोठ्या दगडाने ठेचून निर्घृण हत्या करण्यात आली. दुपारी साधारण अडीचच्या सुमारास झालेल्या या प्रकारामुळे परिसरात भीतीचं सावट पसरलं आहे. खून झालेल्या तरुणाचं नाव तौकीर शेख (वय 22, रा. धनकवडी) असं आहे. तौकीरवर यापूर्वी काही गंभीर गुन्ह्यांची नोंद असल्याचंही पुढे आलं आहे.

सिंहगड रोड भागातील मिनाक्षीपुरम परिसरातील ‘कृष्णकुंज’ इमारतीच्या पार्किंगमधे दुपारच्या वेळेस तौकीर शेख एकटाच बसलेला होता. त्याचवेळी पाच जणांचे टोळके अचानक येथे दाखल झाले. कोणतीही चर्चा न करता त्यांनी हातातील कोयत्याने तौकीरवर जोरदार हल्ला सुरू केला. काही क्षणांतच तौकीर रक्ताच्या थारोळ्यात कोसळला. मात्र हल्लेखोर एवढ्यावरचं थांबले नाही. त्यांनी मोठा दगड उचलून तौकीरवर वारंवार दगडाने प्रहार करून त्याचा जीव घेतला. हत्येनंतर हे सर्व आरोपी काही क्षणांत घटनास्थळावरून फरार झाले.