हडपसरमध्ये मुसळधार पाऊस; झाड कोसळले, नोबल हॉस्पिटल पार्किंगमध्ये पाणी साचले

प्रतिनिधी : सचिन गाडे

पुणे : शहराच्या पूर्व भागातील हडपसर, मांजरी आणि महंमदवाडी परिसरात सोमवारी दुपारच्या सुमारास अवकाळी पावसाने जोरदार हजेरी लावली. दाट ढग दाटून आल्याने आणि विजांच्या कडकडाटासह सुरू झालेल्या पावसामुळे काही ठिकाणी मुसळधार सरी कोसळल्या.

या पावसामुळे अनेक मुख्य व अंतर्गत रस्त्यांवर पाणी साचले. त्यामुळे वाहनांच्या लांबच लांब रांगा लागल्या आणि वाहतुकीचा वेग मंदावला. कामावरून घरी परतणाऱ्या नागरिकांची मोठी गैरसोय झाली.

दरम्यान, जोरदार वाऱ्यामुळे मगरपट्टा परिसरातील उद्यानाजवळ एक मोठे झाड कोसळले. या घटनेमुळे काही काळ वाहतूक विस्कळीत झाली. सुदैवाने कोणतीही जीवितहानी झाली नाही.

तसेच, एका खाजगी रुग्णालयाच्या पार्किंगमध्ये पाणी शिरल्याने वाहनधारक व कर्मचाऱ्यांची धावपळ उडाली. पाण्याचा निचरा न झाल्यामुळे काही काळ परिस्थिती गंभीर बनली होती.

घटनेची माहिती मिळताच पालिकेच्या आपत्ती व्यवस्थापन विभागाने तात्काळ घटनास्थळी धाव घेत झाड हटविणे व पाणी निचरा करण्याचे काम सुरू केले.

अचानक झालेल्या या पावसामुळे नागरिकांना त्रास सहन करावा लागला असून, पुढील काही दिवसांत अशाच हवामानाचा अंदाज व्यक्त करण्यात येत आहे. प्रशासनाने नागरिकांना सतर्क राहण्याचे आवाहन केले आहे.