मार्केट यार्ड आडते असोसिएशनच्या निवडणुकीचे बिगुल; ३० एप्रिलला मतदान

प्रतिनिधी : सचिन गाडे

पुणे : मार्केट यार्डमधील फळ, भाजीपाला, केळी, पान तसेच कांदा-बटाटा विभागातील आडत्यांची शिखर संघटना असलेल्या श्री छत्रपती शिवाजी मार्केटयार्ड आडते असोसिएशनच्या निवडणुकीचा कार्यक्रम जाहीर करण्यात आला आहे. येत्या ३० एप्रिल रोजी सकाळी ९ ते दुपारी ३ या वेळेत मतदान होणार असून, त्याच दिवशी सायंकाळी साडेचार वाजता मतमोजणी करून निकाल जाहीर केला जाणार आहे.
या निवडणुकीत अध्यक्षपदासह विविध पदांसाठी सर्व मतदार मतदानाचा हक्क बजावणार आहेत. अंदाजे ८२० आडते या प्रक्रियेत सहभागी होणार असून, प्रत्येक विभागातील मतदार आपल्या विभागातील उमेदवारांना मतदान करणार आहेत.
१५ एप्रिल रोजी अंतिम मतदार यादी जाहीर होणार आहे. १७ ते १९ एप्रिल दरम्यान सकाळी १० ते दुपारी १ या वेळेत उमेदवारी अर्ज स्वीकारले जाणार आहेत. २० एप्रिल रोजी अर्जांची छाननी होईल, तर २१ ते २३ एप्रिल दरम्यान अर्ज माघारी घेण्याची मुदत देण्यात आली आहे. २४ एप्रिल रोजी अंतिम उमेदवारांची यादी जाहीर करण्यात येणार आहे.
अध्यक्षांसह भाजीपाला ८, फळे४, केळी व पान विभागातून प्रत्येकी एक आणि कांदा-बटाटा विभागातून चार अशा एकूण १९ संचालकांची निवड या निवडणुकीत होणार आहे. निवडणूक निर्णय अधिकारी म्हणून ॲड. तानाजी मांगले काम पाहणार आहेत.