किरकोळ कारणावरून रिक्षा चालकावर कोयत्याने वार

वाकड: किरकोळ कारणावरून तिघांनी एका रिक्षा चालकाला बेदम मारहाण केली. तसेच कोयत्याने वार करत जखमी केले. ही घटना काळाखडक वाकड येथे घडली.

संदीप उर्फ बाळू शांताराम भोसले (वय 32, रा. काळाखडक, वाकड) असे जखमी रिक्षा चालकाचे नाव आहे. त्यांनी याप्रकरणी वाकड पोलीस ठाण्यात फिर्याद दिली आहे. त्यानुसार राहुल विलास चव्हाण (वय 29), गणेश विलास चव्हाण (वय 25), दादा गंगावणे (वय 25, तिघे रा. काळाखडक, वाकड) यांच्या विरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी सोमवारी मध्यरात्री दीड वाजताच्या सुमारास त्यांच्या गाडीतून जात होते. ते काळाखडक येथील पाण्याच्या टाकीजवळ आले असता आरोपीने एक कार रस्त्यात आडवी लावली होती. त्यामुळे फिर्यादींनी त्याला कार बाजूला घेण्यास सांगितले. त्यावरून चिढलेल्या आरोपीने त्याच्या दोन साथीदारांना बोलावून फिर्यादीस मारहाण केली. कोयत्याने वार करून जखमी केले. वाकड पोलीस तपास करीत आहेत.