वाहतूककोंडी मुळे पीएमपीएल चालकाला बेदम मारहाण, चौघांविरूद्ध गुन्हा दाखल

पुणे: वाहतूककोंडी झाल्यामुळे रस्त्यात पीएमपीएल बस बंद करून थांबलेल्या चालकाने मोटारीला जागा न दिल्याच्या रागातून एकाच कुटूंबातील चौघांनी चालकाला शिवीगाळ करीत बेदम मारहाण केली.

ही घटना शुक्रवारी रात्री 7.30 वाजण्याच्या सुमारास शंकरशेठ रस्ता परिसरातील सेव्हन लव्हज चौकात घडली.

याप्रकरणी निखील राजेश कटके (वय 26), कविता राजेश कटके (वय 44) , नितीन जयपाल कटके (वय 47, सर्व रा. श्रीकृष्ण सोसायटी गुलटेकडी ) अशी गुन्हा दाखल करण्यात आलेल्यांची नावे आहेत. पीएमपीएल चालक लक्ष्मण धुमाळ (वय 41, रा. कात्रज) यांनी खडक पोलीस ठाण्यात तक्रार दिली आहे.

पोलिसांनी दिलेल्या माहितीनुसार, तक्रारदार लक्ष्मण हे पीएमपीएल बसचे चालक असून शुक्रवारी बस घेउन शंकरशेठ रस्त्याने निघाले होते. सेव्हन लव्हज चौकात वाहतूककोंडी असल्याने त्यांनी बस थांबवली. त्यावेळी मोटारीतून आलेल्या कटके कुटूंबियाने लक्ष्मण यांना शिवीगाळ केली. आज तुझ्या गाडीची काच फोडतो, असे म्हणत चौघांनी त्यांना बेदम मारहाण केली. पीएमपीएल बस चालकाने वाहनचालकाला रस्ता न दिल्याच्या रागातून संबंधित कुटूंबियाने बसचालकाला बेदम मारहाण केली.

पुढील तपास सहायक पोलीस निरीक्षक नितीनकुमार नाईक करत आहेत.