भंगाराच्या दुकानात स्फोट; तीन जण गंभीर जखमी, एक जण मृत्युमुखी

पुणे: बी टी कवडे रस्ता येथील सानिया स्क्रॅब सेंटर भंगाराच्या दुकानात स्फोट झाल्यामुळे एक जण मृत्युमुखी तीन जण गंभीर जखमी झाले आहेत. जवळपास तीन ते चार किलोमीटर अंतरावर या स्फोटाचा आवाज ऐकू आला.

पोलिसांनी दिलेल्या माहिती नुसार संध्याकाळी साडेपाचच्या दरम्यान बी टी कवडे रोड येथे मोठ्या आवाज होऊन स्फोट झाल्यामुळे नागरिक घाबरले. यावेळी या परिसरातील दुकानांमध्ये जुन्या फ्रिजमधील कॉम्प्रेसर काढताना गॅसची गळती होऊन स्फोट झाला.

यामध्ये मेहबूब शेख (वय ५०) कामगाराचा मृत्यू झाला. तसेच दिलीप मिसाळ (वय ४०), किशोर साळवे,(वय४०) दोन कामगार आणि भंगाराच्या दुकानाचा मालक महमंद सय्यद( वय ५० ) हे सर्व गंभीर जखमी झाले आहेत. सर्वजण रामटेकडी परसरात राहणारे आहेत.

बीटी कवडे रोड येथे अनेक वर्षांपासून सानिया स्क्रॅब सेंटर येथे भंगार गोळा करून विक्री करण्याचे काम सुरू आहे. यादरम्यान भंगारातील वस्तूंचे विल्हेवाट लावून त्यातील महत्त्वाच्या वस्तूचे विभाजन करून विक्री करत असे. आजही चौघेजण गप्पा मारत दुपारी जुन्या फ्रिजमधून कॉम्प्रेसर काढण्याचे काम सुरू होते. अंदाज न आल्याने त्याचा स्फोट होऊन मेहबूब शेख यांचा मृत्यू झाला.