सायबर चोरट्यांनी पुण्यातील तिघांना घातला गंडा, तब्बल ७७ लाखांची फसवणुक

पुणे: सायबर चोरट्यांकडून फसवणुकीचे सत्र सुरुचं असून, पुण्यातील वेगवेगळ्या भागातून फसवणुकीच्या घटना उघडकीस येत आहेत. अशातचं आता सायबर चोरट्यांनी तीन जणांना गुंतवणुकीवर जादा नफा देण्याच्या आमिषाने ७७ लाख रुपयांना गंडा घातला आहे.

याप्रकरणी चोरट्यांवर गुन्हा दाखल करण्यात आला आहे. याप्रकरणी २९ वर्षीय तरुणाने खडक पोलीस ठाण्यात तक्रार दिली आहे.

तक्रारदार तरुण मांजरी भागात राहायला आहे. सायबर चोरट्यांनी ऑक्टोबर महिन्यात तरुणाच्या मोबाइलवर मॅसेज पाठविला होता. शेअर बाजारात गुंतवणूक केल्यास चांगला परतावा मिळेल, असे आमिष दाखविले होते. तरुणाने पैसे गुंतविले. वेळोवेळी १३ लाख ७ हजार रुपये जमा केले. सुरुवातीला तरुणाला चोरट्यांनी परतावा दिला. नंतर मात्र, परतावा दिला नाही. फसवणूक झाल्याचे लक्षात आल्यानंतर त्याने नुकतीच पोलिसांकडे तक्रार दिली. गुन्हे शाखेचे पोलीस निरीक्षक गौड तपास करत आहेत.

अशाच पद्धतीने सायबर चोरट्यांनी लोहगाव भागातील एका व्यावसायिकाची ४७ लाख ६८ हजार रुपयांची फसवणूक केली आहे. याबाबत व्यावसायिकाने विमानतळ पोलीस ठाण्यात तक्रार दिली आहे. गुन्हे शाखेचे पोलीस निरीक्षक राजेंद्र पन्हाळे तपास करत आहेत. सायबर चोरट्यांनी गुंतवणुकीच्या आमिषाने कोंढवा भागातील एकाची १६ लाख ८४ हजार १९२ रुपयांची फसणूक केली आहे. याप्रकरणी कोंढवा पोलिसांनी चोरट्यांवर गुन्हा दाखल केला आहे. गुन्हे शाखेचे पोलीस निरीक्षक सूरज बेंद्रे तपास करत आहेत.