थेऊर गोळीबार, खुन प्रकरणातील दोन फरार आरोपी गजाआड

थेऊर (पुणे): लघुशंका करत असलेल्यांना हटकल्याने गोळीबार करुन दगडफेक केल्याने जखमी झालेल्या सुरक्षा रक्षकाच्या पत्नीचा मृत्यु झाला होता. या प्रकरणात लोणी काळभोर पोलिसांनी खुनाचा गुन्हा दाखल करुन तिघांना त्याचवेळी पकडले होते.

त्यावेळी पळून गेलेल्या तिघांपैकी दोघांना दरोडा व वाहन चोरी पथकाने पकडले.

मयुर शंकर जाधव (वय ३२, रा. कुरुळी बांदल वस्ती, ता. खेड), प्रथमेश ऊर्फ सोन्या आनंदा वाहिले (वय २३, रा. केळगाव, चिंबळी, आळंदी रोड, ता. खेड) अशी अटक केलेल्यांची नावे आहेत.

थेऊर रोडवरील जय मल्हार हॉटेलजवळ लघुशंका करत असलेल्या ६ ते ७ जणांना तेथील सुरक्षा रक्षक अक्षय चव्हाण यांनी हटकले होते. तेव्हा टोळक्यांमधील अजय मुंढे याने आपल्याकडील पिस्तुलातून हवेत गोळीबार केला. चव्हाण पतीपत्नीवर दगडफेक केली. त्यात शीतल अक्षय चव्हाण (वय २९) या दगड लागल्याने जखमी झाल्या होत्या. उपचार सुरु असताना त्यांचा बुधवारी मृत्यु झाला. त्यामुळे पोलिसांनी खुनाचे कलम वाढविले आहे. या घटनेनंतर पळून जाणार्‍या तिघांना पोलिसांनी पकडले. सतीश बारीकराव लोखंडे, अजय दशरथ मुंढे, भानुदास दत्तात्रय शेलार अशी अटक केलेल्यांची नावे आहेत. त्यावेळी तिघे जण पळून गेले होते. पळून गेलेल्यांचा पोलीस शोध घेत होते. दरोडा व वाहन चोरी पथकाला त्यांच्याबाबत माहिती मिळाली़ त्यावरुन पोलिसांनी मयुर जाधव व प्रथमेश वाहिले यांना खेड शिवापूर येथून ताब्यात घेतले. पुढील तपासासाठी त्यांना लोणी काळभोर

पोलिसांच्या ताब्यात दिले आहे.

ही कामगिरी पोलीस आयुक्त अमितेशकुमार, सह पोलीस आयुक्त रंजनकुमार शर्मा, अपर पोलीस आयुक्त शैलेश बलकवडे, पोलीस उपायुक्त निखिल पिंगळे, सहायक पोलीस आयुक्त राजेंद्र मुळीक, वरिष्ठ पोलीस निरीक्षक बिडवई, वाहिद पठाण यांचे मार्गदर्शनाखाली सहायक फौजदार दिनकर लोखंडे, राजेश लोखंडे, पोलीस अंमलदार गणेश ढगे, प्रदीप राठोड, सुहास तांबेकर, कानिफनाथ कारखेले, नितीन मुंढे, महेश पाटील, संदीप येळे, विनायक येवले, समीर पिलाणे, गणेश डोंगरे, नितीन धाडगे यांनी केली आहे.